"Azərbaycan qazının Suriyaya ixracı gücümüzə güc qatacaq, xarici təsirləri neytrallaşdırmaq imkanı yaradacaq" - DEPUTAT

"Azərbaycan qazının Suriyaya nəql edilməsi siyasi, iqtisadi, mənəvi cəhətdən əhəmiyyətlidir və tarixi hadisədir. Suriya ilə Azərbaycan tarixi, mədəni köklərə malik, bir çox ümumi dəyərləri bölüşən ölkələrdir. Əfsuslar olsun ki, Suriya, İran rejiminin xeyir-duası ilə, Cənubi Qafqaz siyasətində Azərbaycana yox, Ermənistanla əməkdaşlığa üstünlük vermişdir".

Bunu Sonxeber.az-a danışan deputat Nəsib Məhəməliyev bildirib.

Deputat qeyd edib ki, Bəşər Əsədin diktatura rejimindən xilas olduqdan sonra, yeni hakimiyyət isə, əksinə, Azərbaycanla hərtərəfli münasibətlərin qurulmasında maraqlıdır:

"Keçid dövrü hökumətinin başçısı Əhməd-əş Şaranın Bakıya səfəri, Prezident İlham Əliyevlə aparılan danışıqlar zamanı əldə olunan razılaşmalardan biri də Azərbaycan qazının nəqli məsələsidir. Razılaşmaya əsasən gün ərzində 3,4 milyon kubmetr qaz nəql olunacaq. Bu da, sutkalıq 700-900 meqavatt elektrik enerjisinin istehsalı deməkdir. Müharibədən çıxmış, tamamilə dağıdılmış ölkə üçün son dərəcə əhəmiyyət kəsb edir.

"Azərbaycan qazı əsasən Avropa ölkələrinə ixrac edilir. Suriya yeni istiqamətdir və Yaxın Şərq regionunda ilkdir. Düşünürəm ki, bunun ardınca yeni üfüqlər açılacaq, iqtisadi layihələr icra olunacaqdır. Prezident İlham Əliyev Suriyanın bərpasında iştirak edəcəyimizi bəyan etdi. Bu da yeni iş yerlərinin açılması, milli şirkətlər üçün gəlir mənbələri, Azərbaycanın Suriya kimi dövlətdə siyasi, iqtisadi varlığı deməkdir. İqtisadiyyatın şaxələndirilməsi isə, hər bir ölkə üçün vacibdir. Digər ölkələrdən asılılıq azalır. Müstəqil iqtisadi siyasət, Azərbaycan dövlətinin gücünə güc qatmaq, xarici təsirləri neytrallaşdırmaq imkanı yaradır".

Sonxeber.az
Telegramda izləyin
Şikayətiniz varsa Whatsapp: 077 7125666

Facebookda Paylaş