 |
 |
Kiss.az |  |
 |
Kuappi – Finlandiyanın İysalmi şəhərində yerləşən restoran. Ginnesin Rekordlar Kitabına görə dünyanın ən kiçik restoranıdır. Restoranın ümumi sahəsi 8 m²-dir və onun 3,6 m²-ni qapalı məkan təşkil edir.[1][2][3]
Restoranın yerləşdiyi tikili 1907-ci ildə Finlandiya Dövlət Dəmiryollarının müfəttişlərinin daxması kimi tikilmişdir. Daxma yol kənarında yerləşən yerindən İysalmi şəhərindəki indiki yerinə köçürülmüşdür.[1][4] Tikili uzun müddət Korkki adı ilə tanınmışdır.
"Kuappi" adı fin dilindəki "kaappi" sözündən yaranmışdır. Bu söz Azərbaycan dilində "divar şkafı" mənasına gəlir. Savo dialektlərində "aa" sait ardıcıllığı tez-tez "ua" kimi oxunur. Bu səbəbdən "kaappi" sözü "kuappi" sözünə çevrilmişdir.[5][6]
2020-ci ilin mayında COVID-19 məhdudiyyətləri səbəbilə restoranın içində eyni anda ancaq bir müştərinin nahar etməsinə icazə veriləcəyi açıqlanmışdır. Lakin restoranın terrası eyni məhdudiyyətə məruz qalmamış və eyni anda iki müştərinin orada yemək yeməsinə icazə verilmişdir.[7]
Restoranda bar, televizor, iki nəfərlik masa və bir tualet yerləşir.[1] Yerə qənaət etmək üçün içkilər kiçik butulkalarda saxlanılır.[8] Restoran spirtli içkiləri servis etmək üçün lazım olan lisenziyaya malikdir.[3] Restoranda eyni anda iki qonağa ev sahibliyi edə bilər və onlara bir ofisiant qulluq edə bilər. Restoranın kiçik terrası var.[1]
Restoranda müxtəlif yeməklər – salatlar, hamburgerlər, balıq, toyuq, ət və göbələk xörəkləri servis olunur. Restoran menyusuna qızardılmış Coregonus albula, ovçu şnitseli, donuz şnitseli və ənənəvi Savo qarağatı kukko daxildir. Desert kimi şokoladlı tort təklif olunur.[1]
Restoran çox kiçik olduğu üçün öz mətbəxi yoxdur. Restoranda servis olunan bütün yeməklər qonşu restoran olan "Olutmestari" restoranının mətbəxində hazırlanır.[9]
2018-ci ilin yayında "Kuappi" restoranı dünyanın ən kiçik rok musiqisi festivalı olan Kuappiroku keçirmişdir. Tədbir üçün cəmi 4 bilet satılmış və festivalda cəmi 1 nəfərdən olan "Impotent Givärs" pank rok qrupu çıxış etmişdir.[9][10] Festivalın biletləri "Facebook" üzərindən hərracla satılmış, iki bilet üçün 125 avroya qədər məbləğ təklif olunmuşdur.[10]
 |
 |
KISS.AZ |  |
 |
|