Mehemmed Eli Ibrahim - Wikipedia - Kiss.az

Məhəmməd Əli İbrahim (ərəb. محمد علي إبراهيم‎; 29 aprel 1900, Qahirə – 2 iyul 1977, Paris) — Kavalalı ailəsinə mənsub Misir şahzadəsi.^[1]

1900-cü ildə Qahirədə dünyaya gəldi. Atası Kavalalı Əhməd Rüfət Paşanın nəvəsi Məhəmməd Vahidəddin İbrahim, anası isə Fazilə Zübeydə xanımdır. Parisdə gəmi mühəndisliyi üzrə təhsil aldı və bir çox idman klubunun fəxri üzvü oldu. Təhsil illərində həm son Osmanlı xəlifəsi Əbdülməcid Əfəndinin, həm də son Osmanlı sultanı Sultan Vahidəddinin nəvəsi olan Xanzadə Sultanla tanış oldu. 19 sentyabr 1940-cı ildə baş tutan toy mərasimiylə evlənən cütlüyün bu nigahdan 2 övladı dünyaya gəldi.

• Sabiha Fazilə İbrahim (8 avqust 1941 - 27 sentyabr 2024) — ilk evliliyi 11 dekabr 1965-ci ildə Parisdə Türkiyə Baş nazirlərindən Suat Hayri Ürgüplünün oğlu Hayri Ürgüplü ilə baş tutdu və 24 sentyabr 1980-ci ildə cütlük boşandı. İkinci evliliyi isə Jean-Alphonse Bernard ilə 18 iyun 1983-cü ildə baş tutdu. İlk evliliyindən 2 övladı dünyaya gəlmişdir:
  • Əli Suad Ürgüplü (28 sentyabr 1967, İstanbul)
  • Mehmed Səlim Ürgüplü (31 oktyabr 1968, İstanbul)
• Əhməd Rüfət İbrahim (31 avqust 1942 - 2 noyabr 2011) — 26 iyun 1969 tarixində Əminə Uşaklıgil ilə evləndi. Övladı olmadı.

1952-ci ildə baş tutan Misirdə iyul inqilabı nəticəsində digər Misir kral ailəsi fərdləri kimi, Məhəmməd Əli İbrahim də sürgün olundu. O əsnada ailə fərdləriylə birlikdə Parisdə olan Məhəmməd Əli İbrahim ölümünədək burada yaşadı və 1977-ci ildə burada vəfat etdi.