 |
 |
Kiss.az |  |
 |
Kazım Novruzəli oğlu Quluzadə (20 may 1908, Bakı – 1979) — Azərbaycan energetiki, texnika elmləri doktoru (1961), professor (1961), Azərbaycan SSR əməkdar elm xadimi (1964), Azərbaycan Neft və Kimya İnstitutunun rektoru (1970–1978).
| Kazım Quluzadə | |
|---|---|
| 1970 – 1978 | |
| Əvvəlki | İsmayıl İbrahimov |
| Sonrakı | İsmayıl İbrahimov |
| Şəxsi məlumatlar | |
| Doğum tarixi | 20 may 1908 |
| Doğum yeri | |
| Vəfat tarixi | 1979 |
| Elmi fəaliyyəti | |
| Elm sahəsi | elektroenergetika |
| Elmi dərəcəsi |
|
| Elmi adı |
|
| Təltifləri |
    |
Kazım Novruzəli oğlu Quluzadə 20 may 1908-ci ildə Bakı şəhərində anadan olmuşdur.[1] 1924-cü ildə orta məktəbi bitirərək N. Nərimanov adına Bakı Sənaye Texnikumunun elektronika şöbəsinə daxil olmuş və elektrik quraşdırıcısı işləmişdir. 1929–1934-cü illərdə Azərbaycan Politexnik İnstitutunun (1930-cu ildən Azərbaycan Neft İnstitutu) Energetika fakültəsində təhsil almışdır.[2]
Kazım Quluzadə təhsilini başa vurduqdan sonra "Azneft" birliyinin Stalin adına mədənində mühəndis-elektrik, 1936-cı ildən isə böyük elektrik mühəndisi vəzifələrində işləmişdir. 1937–1938-ci illərdə "Azneft" birliyinin "Kirovneft" trestinin baş energetiki, 1938–1939-cu illərdə "Aznefthasilat" birliyinin böyük mühəndis-energetiki, 1939–1940-cı illərdə baş energetiki olmuşdur.[2]
1940–1941-ci illərdə Neft Sənayesində Təhlükəsizlik Texnikası Elmi-Tədqiqat İnstitutunda elektron avadanlığı laboratoriyasına rəhbərlik etmiş, 1941–1947-ci illərdə SSRİ Elmlər Akademiyasının Azərbaycan filialının (1945-ci ildən Azərbaycan SSR Elmlər Akademiyası) Energetika İnstitutunda direktorun elmi işlər üzrə müavini vəzifəsində çalışmış, 1947–1952-ci illərdə eyni zamanda elektrik avadanlığı laboratoriyasının rəhbəri olmuşdur.[2]
1948-ci ildə yenidən Azərbaycan Sənaye İnstitutuna (1959-cu ildən Azərbaycan Neft və Kimya İnstitutu) qayıdan Kazım Quluzadə 1978-ci ilə kimi burada Neft sənayesinin energetikası kafedrasının müdiri vəzifəsində pedaqoji fəaliyyətini davam etdirmiş, 1961–1965-ci illərdə paralel olaraq Energetika fakültəsinin dekanı olmuşdur. 1970–1978-ci illərdə Azərbaycan Neft və Kimya İnstitutunun rektoru vəzifəsində işləmişdir.[2]
Kazım Quluzadə 1941-ci ildə namizədlik dissertasiyasını müdafiə etmiş, 1943-cü ildə dosent, 1949-cu ildə baş elmi işçi elmi adını almışdır. 1961-ci ildə doktorluq dissertasiyasını müdafiə edərək texnika elmləri doktoru elmi dərəcəsini almış, professor elmi adına layiq görülmüşdür. Dəfələrlə Rumıniyaya, Almaniya Demokratik Respublikasına tədris və elmi işlərlə bağlı məsləhət xidməti göstərmək üçün ezam olunmuşdur.[2] Frayberq Mədən Akademiyasının (ADR) fəxri doktoru, SSRİ–ADR Dostluq Cəmiyyətinin Azərbaycan şöbəsinin sədri, 1970-ci ildən ümumittifaq "Neft və qaz" jurnalının məsul redaktoru, 1976-cı ildən isə Azərbaycan Sovet Ensiklopediyasının elmi redaksiya şurasının üzvü olmuşdur. 1967 və 1975-ci illərdə 7-ci və 9-cu ümumdünya neft konqreslərində, 1973 və 1976-cı illərdə 12-ci və 13-cü ümumdünya qaz konqreslərində iştirak etmişdir.[1]
Kazım Quluzadə uzun illər boyu dissertasiya şuralarının, elmi-texniki bölmələrin üzvü, institutun elmi şurasının elmi katibi, Respublika Mərkəzi Seçki Komissiyasının üzvü olmuşdur.[2] 200-dən çox elmi işin, o cümlədən 30 kitab-dərsliyin, dərs vəsaitinin, monoqrafiyanın müəllifidir.[3] O, "Lenin", "Şərəf nişanı", "Qırmızı ulduz" ordenləri, Azərbaycan SSR Ali Soveti Rəyasət Heyətinin fəxri fərmanları və medallarla təltif olunmuşdur. 1964-cü ildə "Azərbaycan SSR əməkdar elm xadimi" fəxri adına layiq görülmüşdür.[2]
Kazım Quluzadə 1979-cu ildə vəfat etmişdir.[2]
 |
 |
KISS.AZ |  |
 |
|
.svg){kind=small}